حُلم في اليقظة

^^^^^^^^^^^^^

 

 

سرحت ابعالم افكاري الخيالي

وتخيلت الوكت يحلالي تالي

وبنيت امال ماتخطر على البال

وعشت لحظات وبعالم مثالي

^^^^^^^^^^^^^^^^^^^^^^^

^^^^^^^^^^^^^^^^^^^^^^^^

وتمنيت الحلم ساعات لو طال

وذبت هيمان توه الجو صفالي

ونسيت الواقع المر الچنت بیه

وكرهت الحقد والهم والتعالي

^^^^^^^^^^^^^^^^^^^^^^^^^

^^^^^^^^^^^^^^^^^^^^^^^^^

وصفت روحي مثل ريشه ابوسط ريح

خفيفه وناغمت ريح الشمالي

وحس وزني صفر خالي امن الهموم

ولاهم اليمر ذكره اعلى بالي

^^^^^^^^^^^^^^^^^^^^^^^^^^

^^^^^^^^^^^^^^^^^^^^^^^^^^

أياريت العمر لو يگضي احلام

نعيشه وتنگضي ابطيب الليالي

ولا نصحه اعلى واقع كله احزان

نكد نسعه ونهم والثمر بالي

^^^^^^^^^^^^^^^^^^^^^^^^^

^^^^^^^^^^^^^^^^^^^^^^^^^

مثل اللي يلم الماي بالگاع

إشگد مايجتهد رد چفه خالي

العمر يجري ابمحطات المسافات

إشجنينه ابهالعمر غير التوالي

^^^^^^^^^^^^^^^^^^^^^^^^^

^^^^^^^^^^^^^^^^^^^^^^^^^

إشگد كد وسهر ومناطر أيام

انتراكض والثمن مدفوع غالي

دفعنا العمر بحساب المتاهات

ولابينه الفطن گال اشجرالي

^^^^^^^^^^^^^^^^^^^^^^^^^

^^^^^^^^^^^^^^^^^^^^^^^^^

ولا بينه الحسبهة وگال بس عاد

خل أحفظ رصيد اللي بگالي

اشما نركض تره اتزيد المسافات

بس اللي زهد نال المعالي

^^^^^^^^^^^^^^^^^^^^^^^^^

^^^^^^^^^^^^^^^^^^^^^^^^^

إشگد چانو گبلنه اجداد واحفاد

عافوهة ومشو دنيا الزوالي

أو عود احنه النعمر بيهة هالنوب

أبد هيهات هيهات ومحالي

^^^^^^^^^^^^^^^^^^^^^^^^^

^^^^^^^^^^^^^^^^^^^^^^^^^

سعيد اللي جفاهة وريح البال

شرب صافي النبع مثل الزلالي

وشقي اللي شراهه اباغلى الاثمان

خسر لا من معين ولاله والي

^^^^^^^^^^^^^^^^^^^^^^^^^^

^^^^^^^^^^^^^^^^^^^^^^^^^^

يصاحب عاد خل نتعظ من هاي

ونسعه ابهالعمر لاجل الكمالي

تره دنياك مادامت للاجواد

او عود إدوم للي جيبه عالي

^^^^^^^^^^^^^^^^^^^^^^^^^

^^^^^^^^^^^^^^^^^^^^^^^^^

ألو مليون تملك لو صفر ظال

اخرهه إبگبر حدر الرمالي

إبعد نفسك امن القيل والقال

واحفظ هيبتك يوم السؤالي

^^^^^^^^^^^^^^^^^^^^^^^^^

^^^^^^^^^^^^^^^^^^^^^^^^^^

خفيف الحمل فاز ابيوم الحساب

والحمله ثگل خاب المنالي

إبرزقك لاتهم والباري موجود

خل همك فقط كسب الحلالي

^^^^^^^^^^^^^^^^^^^^^^^^

^^^^^^^^^^^^^^^^^^^^^^^^

وصحح غلطتك مو عيب الاخطاء

بس العيب عاللي ما يبالي

وباريك تره يغفرك الچان

واسعه اتكون محمود الخصالي

^^^^^^^^^^^^^^^^^^^^^^^^^^^

^^^^^^^^^^^^^^^^^^^^^^^^^^^

واللي ايموت شيخلف ابدنياه

غير الزين لو شين الفعالي

ياربي اختم عمرنه ابطيب واحسان

بحق سيد البشر فخر الرجالي

%%%%%%%%%%%%%

 

أبو مرتضى البهادلي

11/3/2004

كوبنهاگن